Jon Uqa Jaqec Je Cijeddoc Jaqiaden

Aqunec Je

Tamanec agena cofadec matu dana oso uqa tamanecna cofadec matu dana oso, ijan Gaias, jaqec je i jaqen. Gaias uqa Kristen dana cajaca cesuladen, eunu Jon uqa Gaias binan sulina. Jon uqa Gaias dana oso, ijan Daiotrefis, eunu batut fagale ec madena.

Je Dunuhnu Dado Mec

1. Feele adec je (1-2)2. Jon uqa Gaias uqana cabinu binan sulina (3-8)3. Daiotrefis uqa kobol me qee odon ec madena (9-10)4. Demitrias uqa kobol me odon ec madena (11-12)5. Cit qoc je (13-14)

3 John

1 Ija tamanec agena cofadec matu, ija Gaias jaqihigina. Gaias hina ijana danah bahic, ija mele bahic mahigina, ija hinanu nalunin migina.

2 O ijana danah bahic, hina ceteh cunug odogona eu me caligiannuca, odocob hina hagca qee me bilegannuca inondugina. Hina doloin me bilia echa dugina. 3 Ge, wawaga meleec cotinel leih age ijaca humeig hina mele je toodogona ec matein eunu ija geh bahic ceelem. 4 Ijana mel age mele je toodogina ec dah migina saen euna ija geh bahic ceeligina, odocob ceelec eu ijana ceelec cunug wooldona.

Gaiasna cabi eu me bahic

5 O ijana danah bahic, hina wawige meleec cotigeil me bahic cewel uadagana. Odimeg hina cotigeil leih agenu qee dogonaha cewel uadagana. Hina kobol euna mele je tutuc toodu odogona. 6 Cotigeil eu age tamanec amagana hinana nalunuga mec eunu je qasali maadein. Odocob age saen agena jic coboqagannu hina haun cesuladegan eu me bahic. Hina odi cesulaadeg hina Anutna gale doc toodogan. 7 Ge, age Kraisna cabi ocnu cocobi belein. Odocob age ameg oso haiden dananadec qee oloin. 8 Eunu ege dana eundecca gami osoben Anutna mele je cabi gagadic mudeqannu dana eu cesuladoqale.

Daiotrefis uqa kobol me qee odon

9 Ija je oso tamanec dana cajaca wele jaqiadem. Euqa Daiotrefis uqa aquniadi biligiannu gale dona eu ija jejeni qee toodona. 10 Eunu ija ageca hufig ija uqana kobolnu maadigen. Uqa ijanu je me qee madena. Odimei uqa eu himec qee odona qa uqa wawige meleec cotigeil qee ehadena, odimei uqa dana age wawige meleec cotigeil ehadecnu gale adena eu cahacadimei tamanecnadec ititacadena.

Demitrias uqa kobol me odon

11 O ijana danah bahic, hina qisol mec kobol cicilonoga cain ogaun qa hina kobol me odogina eundec cicilonoga oga. Dana oso uqa me odona eu uqa Anutnadec. Dana oso uqa qisol mena eu uqa Anut qee fel.

12 Dana cajaca cunug age Demitrias kobol me odonanu je qasali madein. Odocob Anutna mele je Demitrias kobol me odonanu je qasali maden. Ijaha Demitrias kobol me odonanu je qasali madem. Odocob hina dogona, ijana qasali madec je eu mele.

Cit qoc feele adec je

13 Ija je jaqihecnu geh bahic nijia qa ija bagacna jaqihecnu qee gale tena. 14 Euqa ija saen nag odi hinaca limig fecihecemin gami mecidod bibili je madewan ec cisdugina.

Anutna malol bilec hinaca biliale. Hinana danah bahic cunug ene bilegina eu feele hec sulduhegina. Hina ijana danah bahic cunug osolosol feele adagale.